謝賢(四哥)獲頒發「第三十八屆香港電影金像獎」之終身成就獎,除咗佢無數嘅經典影視作品之外,佢一生嘅感情經歷都為人津津樂道!
風度翩翩、俊朗不凡,任何時候都要保持住最住狀態。四哥嘅風流小生形象,可以話係由佢16歲維持到82歲。每一次出現都係Chok到行,但你唔會對佢反感,因為你會發現呢個人嘅Chok係喺骨子裏、係Come from佢個Soul。
佢係一個天生活喺鎂光燈底下嘅人。有型有款嘅佢,身邊從來都不乏女伴,可以話係天生嘅女人磁石,四哥最廣為人知嘅5段情都係非常轟動,但到底,佢一生中最愛又係邊個?
謝賢與嘉玲
四哥早期與女星嘉玲合作多部電影,日久生情,大家都認為佢哋拍拖,佢哋都順理成章一齊咗,不過四哥當時貪玩成日都掉低嘉玲一個。四哥同嘉玲行咗11、12年,後來嘉玲識咗一個泰國人,忽然同四哥講要結婚,四哥仲去參加婚禮。就咁聽,都幾奇情。
甄珍與謝賢
甄珍與劉家昌
之後1974年同甄珍結婚,但二人嘅婚姻只係維持咗兩年。甄珍係當年喺台灣紅透半邊天嘅玉女,被視為台灣瑰寶。甄珍曾經喺專訪講過,台灣媒體覺得甄珍畀香港嘅謝賢搶走,一直都唔喜歡謝賢,甚至「幫」劉家昌將佢搶返嚟。甄珍最後選擇同劉家昌一齊,但佢仍然對當年向謝賢提出離婚一幕銘記於心,相反謝賢已經唔記得當時有幾傷:「劉家昌夠毅力嘛,人是有感情的動物,變心唔怪佢,人之常情。」
謝賢與蕭芳芳
第3位女友蕭芳芳,佢大讚女方好孝順、好乖、好上進。不過「沙哩弄銃」嘅四哥唔係蕭芳芳想要嘅男人。四哥亦覺得自己唔合適自動退出。十多年之後,兩個傾番偈亦冇芥蒂。
{{hket:inline-image name="0811-00282-008b2.jpg"}}{{/hket:inline-image}}
郎才女貌。
狄波拉同謝賢生咗霆鋒同婷婷。
第4位女友係狄波拉,亦係佢第2任妻子,謝賢都係對拉姑讚不絕口:「好識做家事同照顧男人,我咩都不使做,佢照顧周到,有時我打牌打到天光,又係我唔啱,總之呢個係上天安排。」
謝賢同CoCo嘅「爺孫戀」都好轟動。
第5位女友就係近日被踢爆復合番、細39歲嘅內地女友CoCo。不過依家嘅四哥覺得愛情都唔重要:「上了年紀對女人唔會有太多心思,朋友最重要。」佢仲話如果依家要佢結婚,佢死畀你睇。
君子分手不出惡言,謝賢同每個女伴分開都係好嚟好去,都唔會講女方半句壞話。甚至佢同女方、同女方嘅現任,都係朋友。講起每段感情嘅結束嘅原因佢都會講:「又係我自己衰,衰謝賢!成日想玩!」佢風流,但其實佢唔下流。問到佢最愛係邊個,佢話自己5個都愛。男人唔壞,女人唔愛,或者謝賢就係有Bad Boy嘅致命性吸引力,佢講嘅嘢聽落好瀟灑,對每段感情都輕描淡寫,但換個角度,係每個人都冇辦法喺佢心中留下深刻嘅痕跡,令人更加有「征服」佢嘅衝動。